14-уми октябри соли равон дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар мавзӯи “Пешгирии хавфҳои ниҳоӣ дар қонунгузорӣ тавассути гузаронидани экспертизаи зиддикоррупсионӣ” ва пешниҳоди Агентии назорати давлатии молиявӣ ва мубориза бо коррупсияи Ҷумҳурии Тоҷикистон “Оид ба рафъи ҳолатҳое, ки ба содир шудани ҷиноят ва дигар қонуншиканиҳо мусоидат мекунанд”, ҷаласаи корӣ баргузор гардид, ки дар он муовини вазири тандурустӣ ва ҳифзи иҷтимоии аҳолӣ Ҳабибулло Хайруллозода, сардори Раёсати экспертизаи давлатии зиддикоррупсионии санадҳои меъёрии ҳуқуқии Агентии назорати давлатии молиявӣ ва мубориза бо коррупсияи Ҷумҳурии Тоҷикистон, подполковники адлия Муқимӣ Нигора Аминзода, сарнозири ҳамин раёсат Наҷмиддинзода Зайниддин, сардорони як қатор раёсат ва шуъбаҳои зерсохтори вазорат иштирок намуданд.
Қайд гардид, ки дар шароити муосир, ки мубориза бо коррупсия ба як самти афзалиятноки сиёсати давлатӣ табдил ёфтааст, зарурати таҳкими механизмҳои назоратӣ ва таҳлили амиқи санадҳои меъёрии ҳуқуқӣ беш аз пеш эҳсос мегардад.
Гуфта шуд, ки экспертизаи зиддикоррупсионӣ — ин раванди таҳлили лоиҳаҳои санадҳои меъёрии ҳуқуқӣ бо мақсади ошкор ва бартараф намудани меъёрҳое мебошад, ки метавонанд заминаи амалишавии коррупсияро фароҳам созанд.
Дар идомаи чорабинии мазкур сардори Раёсати экспертизаи давлатии зиддикоррупсионии санадҳои меъёрии ҳуқуқии Агентии назорати давлатии молиявӣ ва мубориза бо коррупсияи Ҷумҳурии Тоҷикистон, подполковники адлия Муқимӣ Нигора Аминзода дар мавзӯи “Пешгирии хавфҳои ниҳоӣ дар қонунгузорӣ тавассути гузаронидани экспертизаи зиддикоррупсионӣ” маърӯза намуд.
Ҳамин тавр, дар чорабинии мазкур ба масъалаҳои пешгирии омилҳои номатлуб, аз ҷумла коррупсия таваҷҷуҳи хоса зоҳир карда шуда, аз ҳозирин даъват ба амал оварда шуд, ки дар ин самт саҳми хешро гузоранд.
