Дар Муассисаи давлатии “Хона-интернати пиронсолон ва маъюбони шаҳри Турсунзода” имрӯз ба муносибати ҷашни хуҷастаи Наврӯзи байналмилалӣ чорабинии бошукӯҳи идона доир гардид.
Дар чорабинӣ директори Агентии давлатии ҳифзи иҷтимоии аҳолии Ҷумҳурии Тоҷикистон Абдулло Сафарзода, роҳбарият ва бошандагони муассисаи болозикр ширкат варзиданд.
Дар саҳни Хона- интернат ба ифтихори таҷлили сазовори ҷашни зебои Наврӯзи оламафрӯз дастархони идона ва ҳунарҳои мардумӣ ба маърази тамошо гузошта шуданд.
Меҳмонон нахуст аз намоишгоҳи ҷашнӣ дидан карда, бо дастархони идонаи оросташуда шинос гаштанд.
Баъдан, директори Агентии давлатии ҳифзи иҷтимоии аҳолии Ҷумҳурии Тоҷикистон Абдулло Сафарзода бо сухани табрикотӣ баромад карда, бошандагони муассисаи мазкурро аз номи роҳбарияти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон табрику шодбош намуд.
Аснои суханронии хеш номбурда аз таърихи ин ҷашн куҳан ва таваҷҷӯҳи давлату Ҳукумати мамлакат баҳри эҳёи ин иди бостонии миллати тоҷик ёдовар гашт.
Дар баробари ин, Абдулло Сафарзода аз дастгириҳои Пешвои муаззами миллат муҳтарам Эмомалӣ Раҳмон нисбат ба табақаҳои ниёзманди аҳолӣ низ махсус ёдовар шуда, баргузории чорабинии идонаро идомаи таваҷҷӯҳ ва ғамхориҳои падаронаи Сарвари давлат нисбат ба пиронсолону маъюбони кишвар арзёбӣ намуд.
Баъдан, бо пешниҳоди барномаи фарҳангӣ бошандагони муассисаи болозикр дар зери навои суруду мусиқии саршор аз баҳору Наврӯз шодмонӣ намуданд.
