Ҳамкориҳои Вазорати тандурустӣ ва ҳифзи иҷтимоии аҳолии Ҷумҳурии Тоҷикистон бо Донишгоҳи илмҳои тиббии «Теҳрон»-и Ҷумҳурии Исломии Эрон зимни вохурии маҷозии масъулини Вазорати тандурустӣ ва ҳифзи иҷтимоии аҳолӣ бо намояндагони донишгоҳи мазкур мавриди баррасӣ қарор гирифтанд.
Зимни вохурии маҷозӣ ҷонибҳо доир ба масъалаҳои табодули таҷрибаи табибон, аз ҷумла гузаронидани такмили ихтисос дар давраҳои кӯтоҳмуддат ва дарозмуддат барои табибони тоҷик дар заминаи беморхонаҳои алоқаманди донишгоҳи мазкур мубодилаи афкор намуданд.
Дар баробари ин, масъалаи таҳияи лоиҳаи Ёддошти тафоҳуми ҳамкорӣ байни Донишгоҳи илмҳои тиббии «Теҳрон»-и Ҷумҳурии Исломии Эрон ва Вазорати тандурустӣ ва ҳифзи иҷтимоии аҳолии Ҷумҳурии Тоҷикистон низ мавриди баррасӣ қарор гирифта, ҷонибҳо ба имзо расонидани ин санадро барои таҳкими ҳамкориҳои дуҷониба ва рушди соҳа муҳим арзёбӣ намуданд.
