Бо мақсади омода намудани омӯзгорони сатҳи миллӣ дар асоси дархост ва дар амал татбиқ намудани «Харитаи роҳ»-и Созмони умумиҷаҳонии тандурустӣ дар минтақаҳои Аврупо ва Осиёи Миёна ва таҳия намудани барномаи таълимии 2-моҳа барои ҳамшираҳои тибби оилавӣ оид ба роҳбарӣ ва идоракунии тандурустӣ, имрӯз, 27-уми октябри соли равон, дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон барои омӯзгорони Муассисаи давлатии «Маркази ҷумҳуриявии таълимию клиникии кори ҳамширагӣ» ва ҳамшираҳои калони муассисаҳои давлатии марказҳои саломатии шаҳри Душанбе даври омӯзишӣ оғоз гашт.
Дар оғози даври омӯзишӣ роҳбари намояндагии Ташкилоти умумиҷаҳонии тандурустӣ дар Тоҷикистон Виктор Олшавский, сардори Раёсати таҳсилоти тиббию фарматсевтӣ, сиёсати кадрҳо ва илми Вазорати тандурустӣ ва ҳифзи иҷтимоии аҳолии Ҷумҳурии Тоҷикистон Шаҳло Ашуриён, директори Муассисаи давлатии «Маркази ҷумҳуриявии таълимию клиникии кори ҳамширагӣ» Зуҳро Абдураҳмонзода ва мутахассисони соҳа иштирок намуданд.
Зимни ифтитоҳи даври омӯзишӣ аз ҷониби масъулин доир ба ҳадаф ва мақсади даври омӯзишӣ андешаронӣ сурат гирифта, дар ин замина қайд карда шуд, ки саҳми ҳамшираҳои тибби оилавӣ дар таъмини ҳифзи саломатии аҳолӣ назаррас мебошад.
Ёдовар мешавем, ки даври омӯзишии мазкур то 31-уми октябри соли равон идома ёфта, дар доираи он аз ҷониби мутахассисони соҳа ба иштирокчиён маърӯзаҳо пешниҳод карда хоҳад шуд.
