Санаи 11-уми июни соли равон бо иштироки муовини якуми вазири тандурустӣ ва ҳифзи иҷтимоии аҳолии Ҷумҳурии Тоҷикистон Ғафур Муҳсинзода ва роҳбари намояндагии Хазинаи кӯдакони Созмони Милали Муттаҳид (ЮНИСЕФ) дар Тоҷикистон Артур ван Дизен дар Беморхонаи марказии ноҳияи Данғара ду сехи истеҳсоли оксиген мавриди истифода қарор гирифт.
Бо назардошти он, ки ҳифзи саломатии модарону кӯдакон яке аз самтҳои афзалиятноки соҳаи тандурустии мамлакат ба шумор меравад, як сехи истеҳсоли оксиген дар шуъбаи таваллудхонаи Беморхонаи марказии ноҳияи Данғара ҷойгир карда шудааст, ки барои занони ҳомила ва тифлони навзод дар ҳолати зарурият хизмат мерасонад.
Иттилоъ дода шуд, ки тамоми шуъбаҳои таваллудхона бо хати оксиген таъмин гардида, барои фаъолияти сехҳои мазкурро ба роҳ мондан мутахассисон омӯзонида шудаанд ва аллакай мустақилона кори сехҳоро идора мекунанд.
Тавассути сехи дигари истеҳсоли оксигени дар беморхонаи мазкур ҷойгиргардида имкон ҳаст, ки дар баробари таъмини беморони худи муассисаи тандурустӣ, ҳамзамон ба беморхонаҳои шаҳру ноҳияҳои гирду атрофи ноҳияи Данғара низ дар ин самт хизмат расонида шавад.
Пас аз ба истифода додани сехҳои истеҳсоли оксиген муовини якуми вазири тандурустӣ ва ҳифзи иҷтимоии аҳолии Ҷумҳурии Тоҷикистон Ғафур Муҳсинзода ва роҳбари намояндагии Хазинаи кӯдакони Созмони Милали Муттаҳид (ЮНИСЕФ) дар Тоҷикистон Артур ван Дизен бо фаъолияти шуъбаи таваллудхонаи Беморхонаи марказии ноҳияи Данғара шинос шуданд.
Дар ин ҷо ҳамзамон Ғафур Муҳсинзода бо як қатор наздикони беморон ва худи беморон низ суҳбат намуда, доир ба вазъи хизматрасонии тиббӣ аз онҳо пурсон шуд.
Дар умум, бо мавриди истифода қарор додани ду сехи истеҳсоли оксиген дар Беморхонаи марказии ноҳияи Данғара хизматрасонии тиббӣ ба аҳолӣ боз ҳам беҳтар гардида, эҳтиёҷоти беморон дар ин муассисаи тандурустӣ бо он пурра таъмин хоҳад шуд.
