Имрӯз, 13-уми марти соли равон дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон вобаста ба пешгирии омилҳои коррупсионӣ дар байни кормандони соҳаи тандурустӣ ва ҳифзи иҷтимоии аҳолӣ вохурӣ доир гашт, ки дар он муовини вазири тандурустӣ ва ҳифзи иҷтимоии аҳолӣ Абдухолиқ Амирзода, нозири калони Раёсати экспертизаи давлатии зиддикоррупсионии санадҳои меъёрии ҳуқуқиии Агентии назорати давлатии молиявӣ ва мубориза бо коррупсияи Ҷумҳурии Тоҷикистон Собирзода Наврӯз, сарнозири Раёсати экспертизаи давлатии зиддикоррупсионии санадҳои меъёрии ҳуқуқиии Агентии назорати давлатии молиявӣ ва мубориза бо коррупсияи Ҷумҳурии Тоҷикистон Азамзода Шаҳром, сардорони раёсату шуъбаҳо ва кормандони дастгоҳи марказӣ иштирок намуданд.
Дар оғози вохурии мазкур Абдухолиқ Амирзода, муовини вазири тандурустӣ ва ҳифзи иҷтимоии аҳолии мамлакат вобаста ба масоили мафҳуму моҳияти коррупсия муфассал андешаронӣ намуд.
Баъдан, Собирзода Наврӯз, нозири калони Раёсати экспертизаи давлатии зиддикоррупсионии санадҳои меъёрии ҳуқуқиии Агентии назорати давлатии молиявӣ ва мубориза бо коррупсияи Ҷумҳурии Тоҷикистон баромад намуда, зимни суханронии хеш оид ба ҳолатҳои коррупсионӣ ва роҳҳои мубориза алайҳи ин зуҳурот, корҳои пешгирии коррупсионӣ дар байни кормандони тиб, оқибатҳои даст задан ба амалҳои ришваситонӣ ва хисороту хислатҳои манфии ин зуҳурот ба ҷомеа ва давлат маълумот дод.
Тавре дар ҷаласаи мазкур қайд гардид, дар ҳақиқат коррупсия аз зуҳуроти мурраккаби ҷамъиятӣ буда, он ба рушди минбаъдаи кишварҳои олам ва таъмини ҳуқуқҳои конститутсионии шаҳрвандон таъсири манфии худро мерасонад. Айни ҳол аз Созмони Миллали Муттаҳид сар карда, дар тамоми кишварҳои олам барои аз байн бурдани ин падидаи номатлуб чораҳои зарурӣ андешида мешаванд.
Дар кишвари мо низ мубориза бо коррупсия яке аз самтҳои афзалиятноки Ҳукумати Ҷумҳурии Тоҷикистон ба ҳисоб рафтаву бо ин мақсад мақомоти дахлдор таъсис ва ҳуҷҷатҳои муҳим оид ба мубориза бо коррупсия таҳия ва қабул карда шудааст.
