Дар доираи сафари корӣ ба вилояти Суғд шаби 11-уми октябри соли равон вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода дар шаҳри Хуҷанд бо рафти корҳои сохтмонии як қатор иншоотҳои нави тандурустӣ шинос гашт.

Зимни боздид вазири тандурустӣ ва ҳифзи иҷтимоии аҳолии Ҷумҳурии Тоҷикистонро Раиси шаҳри Хуҷанд, роҳбарияти Раёсати тандурустии вилояти Суғд ва дигар шахсони масъул ҳамроҳӣ намуданд.

Бояд зикр намуд, ки номбурда дар шаҳри Хуҷанд бо ҷараёни корҳои сохтмонии Беморхонаи клиникии рақами 1-и шаҳри Хуҷанд, Маркази вилоятии эндокринология, Маркази вилоятии саратоншиносӣ шинос гашт.

Аснои боздид Ҷамолиддин Абдуллозода ба масъалаҳои бо сатҳу сифати баланд ва дар муҳлати муайяншуда ба анҷом расонидани корҳои сохтмонии иншоотҳои нави тандурустӣ таваҷҷӯҳи хоса зоҳир намуд.

Дар ин замина, ба масъулин ҷиҳати босифат ва дар муҳлати муайянгашта ба итмом расонидани корҳои сохтмонӣ дар муассисаҳои навбунёд аз ҷониби вазири тандурустӣ ва ҳифзи иҷтимоии аҳолии кишвар Ҷамолиддин Абдуллозода дастуру супоришҳои мушаххас дода шуд.