20-уми апрели соли равон дар шаҳри Бишкеки Ҷумҳурии Қирғизистон ҷаласаи нуҳуми вазирони тандурустии кишварҳои узви Созмони ҳамкории Шанхай (СҲШ) доир гашт, ки дар он ҳайати Тоҷикистон таҳти роҳбарии вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода иштирок ва суханронӣ намуд.

Дар ҷалаи мазкур роҳбарият ва намояндагони вазоратҳои тандурустии кишварҳои узви СҲШ ва ҳамзамон мудири Дафтари минтақавии Созмони ҷаҳонии тандурустӣ (WHO) барои Аврупо Ҳанс Ҳенрӣ Клюге ширкат варзиданд.

Дар рафти ҷаласа иштирокчиён доираи васеи масъалаҳои муҳими рушди соҳаи тандурустӣ, аз ҷумла беҳтар кардани идоракунии давлатии низоми тандурустӣ, баланд бардоштани устувории низомҳои миллии тандурустӣ, рушди технологияҳои рақамӣ ва ташаббусҳо оид ба густариши ҳамкориҳои бисёрҷониба дар доираи СҲШ-ро баррасӣ карданд.

Таваҷҷуҳи махсус ба табдили рақамии соҳаи тандурустӣ, ҷорӣ намудани системаҳои муосири иттилоотӣ, рушди тибби фосилавӣ ва афзоиши дастрасии хизматрасонии тиббӣ, махсусан барои сокинони минтақаҳои дурдаст зоҳир карда шуд.

Дар суханронии худ ҳайати Тоҷикистон татбиқи мунтазами ислоҳоти соҳаи тандурустӣ дар кишварро, ки ба беҳтар кардани сифат ва дастрасии хизматрасонии тиббӣ нигаронида шудааст, қайд кард. Аз ҷумла густариши инфрасохтори тандурустӣ, навсозии муассисаҳои тиббӣ ва беҳтар кардани нишондиҳандаҳои асосии тандурустии ҷамъиятӣ дар кишвар махсус таъкид карда шуд. Дар ин замина, коҳиши сатҳи фавти кӯдакон ва модарон, инчунин коҳиши умумии бемориҳои сироятӣ ва ғайрисироятӣ қайд гардид.

Дар анҷом протоколи ҷаласаи нуҳуми вазирони тандурустии кишварҳои узви Созмони Ҳамкории Шанхай ба имзо расид.