Рӯзи 25-уми сентябри соли 2025 дар шаҳри Ню-Йорки Иёлоти Муттаҳидаи Амрико дар ҳошияи ҷаласаи 80-уми Маҷмааи умумии Созмони Милали Муттаҳид ҷаласаи сатҳи баланд оид ба пешгирӣ ва назорати бемориҳои ғайрисироятӣ ва таҳкими солимии равонӣ баргузор гашт, ки дар он вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода иштирок ва суханронӣ намуд.
Дар ҷаласаи мазкур вазирони тандурустии кишварҳои аъзо ва ҳамзамон намояндагони ташкилотҳои бонуфузи дар соҳаи тандурустӣ амалкунанда ширкат доштанд.
Қобили зикр аст, ки ҷаласаи номбурда як рӯйдоди калидӣ барои сарони давлатҳо ва ҳукуматҳо, ҷомеаи шаҳрвандӣ, академияҳо, хайрхоҳон ва бахши хусусии дахлдор барои баррасии пешрафт ва уҳдадориҳо оид ба амалҳои тезонидашуда барои марҳилаи навбатии вокуниш ба бемориҳои ғайрисироятӣ арзёбӣ гашта, мавзӯи умумии вохӯрии сатҳи баланд «Баробарӣ ва ҳамгироӣ: тағйир додани ҳаёт ва воситаҳои зиндагӣ тавассути роҳбарӣ ва амал оид ба бемориҳои ғайрисироятӣ ва мусоидат ба солимии равонӣ ва некуаҳволӣ» унвон гирифта буд.
