24-уми сентябри соли равон дар шаҳри Ню-Йорки Иёлоти Муттаҳидаи Америка дар ҳошияи «Ҳафтаи сатҳи баланд»-и иҷлоси 80-уми Маҷмаи Умумии Созмони Милали Муттаҳид (СММ) вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода дар чорабинии сатҳи баланд дар мавзӯи «Иқтисоди сиёсии татбиқи кӯмаки аввалияи тиббию санитарӣ: тағйироти асосӣ дар сиёсат» иштирок ва суханронӣ намуд.
Дар чорабинии мазкур вазирони тандурустии як қатор кишварҳои аъзои СММ ва намояндагони ташкилотҳои байналмилалии дар соҳаи тандурустӣ фаъолияткунанда ширкат варзиданд.
Ҷамолиддин Абдуллозода доир ба вазъи бахши кумаки аввалияи тиббию санитарӣ, дастовардҳо ва дурнамои рушди соҳа дар Ҷумҳурии Тоҷикистон ба ҳозирин маълумот пешниҳод кард.
Зимни ҷаласаи мазкур масъалаҳои эътилофи глобалӣ оид ба кӯмаки аввалияи тиббӣ: тавсеаи уҳдадориҳои сиёсӣ ва кафолатҳо барои баробарӣ ва устуворӣ, самтҳои асосии сиёсат оид ба таҳкими кӯмаки аввалияи тиббӣ ҳамчун асос барои ноил шудан ба ҳадафҳои васеътари ҷомеа ва стратегии рушд ва дигар масъалаҳои муҳими соҳа баррасӣ гаштанд.
