Дар доираи ташрифи миссияи Бонки Ҷаҳонӣ ба Ҷумҳурии Тоҷикистон 22-юми апрели соли ҷорӣ дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон вохурии муовини вазири тандурустӣ ва ҳифзи иҷтимоии аҳолӣ Ҳабибулло Хайруллозода бо намояндагони гурӯҳи Бонки Ҷаҳонӣ баргузор гашт.
Нахуст Ҳабибулло Хайруллозода меҳмононро ба вазорат хайрамақдам гуфта, аз ҳамкориҳои судманди дуҷониба бо бонки мазкур дар бахши низоми ҳифзи иҷтимоии аҳолӣ ёдовар шуд.
Зимни вохурӣ масъалаҳои марбут ба фаъолияти лоиҳаи болозикр дар самти рақамикунонии низоми нафақа ва суғуртаи иҷтимоӣ ва модулҳои азнавсохташудаи кумакҳои унвонии иҷтимоӣ ва экспертизаи тиббию иҷтимоӣ дар Тоҷикистон мавриди баррасӣ қарор дода шуданд.
Ҳамзамон, ҷонибҳо масъалаҳои ҷори намудани системаи ҳамгирошудаи Кейс-менеҷмент дар 5 ноҳияи пилотӣ ва гузаронидани як қатор омӯзишҳо барои кормандони соҳаи ҳифзи иҷтимоиро низ баррасӣ карданд.
Мавриди зикр аст, ки модулҳои навтаъсис дар доираи чорабиниҳои ба нақша гирифташуда то охири соли 2026 амалӣ карда мешаванд.
Ёдовар мешавем, ки инчунин зимни ташриф ба Вазорати тандурустӣ ва ҳифзи иҷтимоии аҳолӣ намояндагони Бонки ҷаҳонӣ бо гурӯҳи татбиқи лоиҳаи “Навсозии ҳифзи иҷтимоӣ ва ҳамгироии иқтисодӣ” дар назди Вазорати тандурустӣ ва ҳифзи иҷтимоии аҳолии Ҷумҳурии Тоҷикистон низ вохурӣ намуда, рафти татбиқи лоиҳаи мазкурро баррасӣ намуданд.
