Рӯзҳои 10-11 октябри соли 2024 дар Вазорати тандурустӣ ва ҳифзи иҷтимоии Ҷумҳурии Тоҷикистон семинари омӯзишӣ дар мавзӯи “Такмили малакаи рӯзноманигорон ва блогерон дар таҳия кардани мавод оид ба гепатитҳои вирусӣ ва инъикоси онҳо дар расонаҳо” баргузор гардид.
Дар семинари мазкур муовини сардори Хадамоти назорати давлатии санитарию эпидемиологӣ Наврӯз Ҷаъфаров, сироятшинос, номзади илмҳои тиб Мирҳоҷӣ Хуҷамуротов ва рӯзноманигор Раҷаб Мирзо иштирок ва суханрони намуданд.
Қайд гардид, ки баланд бардоштани сатҳи малакаи рӯзноманигорон ва блогерон оид ба инъикоси мавзуи гепатитҳои вирусӣ ва бунёди пойгоҳи иттилоотӣ барои дарки муҳимияти мушкилоти гепатитҳои вирусӣ барои намояндагони муассисаҳои давлатӣ, кормандони тиб ва аҳолӣ равона гардидааст.
Ҳамчунин гуфта шуд, ки семинари омӯзишӣ оид ба хусусиятҳои омода кардани матолиб барои матбуот, телевизион, радио ва шабакаҳои иҷтимоӣ оид ба гепатитҳо, роҳҳои муосири ташхис, табобат ва пешгирии он, инчунин оид ба паст кардани сатҳи доғгузорӣ ва табъиз нисбати гирифторони бемории гепатитҳои вирусӣ ва аҳолии осебпазир ташкил ва баргузор гардидааст.
Бояд гуфт, ки семинари омӯзишӣ тибқи нақшаи муштараки Вазорати тандурустӣ ва ҳифзи иҷтимоии аҳолӣ ва Ташкилоти ҷамъиятии ҷумҳуриявии “Афиф” бо дастгирии ширкати фармасевтии амрикоии Gilead Science Inc дар доираи лоиҳаи “Мусоидат дар пешгирӣ ва мубориза бо гепатити вирусӣ дар Ҷумҳурии Тоҷикистон” барои такмили малакаи рӯзноманигорон ба роҳ монда шуд.
