Бо мақсади аз наздик ошноӣ пайдо кардан аз рафти фаъолияти муассисаҳои тандурустӣ ва сатҳу сифати хизматрасонии тиббӣ ба аҳолӣ вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода дар доираи сафари корӣ ба вилояти Суғд ба Беморхонаи клиникавии вилояти Суғд ба номи Сангин Қутфиддинов дар шаҳри Хуҷанд ташриф оварда, бо фаъолияти он шинос шуд.
Аснои шиносоӣ вазири тандурустӣ ва ҳифзи иҷтимоии аҳолии кишвар аз ҳолати муассисаи номбурда, ҷараёни фаъолияти он, вазъи санитарию эпидемиологӣ, таъминот бо доруворӣ ва ҳолати таҷҳизотҳои тиббӣ дидан кард.
Ҳамзамон, Ҷамолиддин Абдуллозода, вазири тандурустӣ ва ҳифзи иҷтимоии аҳолии Ҷумҳурии Тоҷикистон зимни боздиди хеш бо рафти табобати як қатор беморон низ шинос гашт.
Ҳамин тавр, ҷиҳати бартараф намудани мушкилоту камбудиҳои ҷойдоштаи соҳа ва бо ин роҳ боз ҳам беҳтар кардани сатҳу сифати хизматрасонии тиббӣ ба аҳолӣ аз ҷониби Ҷамолиддин Абдуллозода, вазири тандурустӣ ва ҳифзи иҷтимоии аҳолии Ҷумҳурии Тоҷикистон ба масъулин дастуру супоришҳои мушаххас дода шуд.
