Бо мақсади аз наздик шинос шудан бо рафти хизматрасонии тиббӣ ба аҳолӣ, ҳамчунин таҳлил ва баррасии масъалаҳо ва мушкилоти мавҷудаи соҳа, роҳбарияти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон мунтазам ба шаҳру ноҳияҳои кишвар сафар намуда, бо фаъолияти муассисаҳои тандурустӣ аз наздик шиносоӣ пайдо менамояд.
Имрӯз, 12-уми марти соли равон вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода ба ноҳияи Файзобод сафари корӣ анҷом дода, бо вазъи хизматрасонии тиббӣ, сифати ташхису табобат, ҳолати нигоҳубини беморон, инчунин корҳои ободониву созандагӣ дар муассисаҳои тандурустии ноҳияи мазкур шинос гардид.
Дар доираи сафари корӣ Ҷамолиддин Абдуллозода аз Маркази саломатии ноҳияи Файзобод дидан намуда, бо фаъолияти шуъбаҳо, ҳолати таҷҳизоти тиббӣ, шароити кории кормандони соҳаи тиб ва имкониятҳои муассиса аз наздик шинос шуд.
Ҳамзамон, зимни суҳбат бо роҳбарият ва кормандони муассиса вазири тандурустӣ ва ҳифзи иҷтимоии аҳолӣ ҷиҳати боз ҳам беҳтар намудани сатҳу сифати хизматрасонии тиббӣ ба аҳолӣ, баланд бардоштани масъулияти касбӣ, истифодаи самараноки таҷҳизоти тиббӣ ва таъмини муносибати хуб бо беморон дастуру супоришҳои мушаххас дод.
Зикр гардид, ки беҳтар намудани сатҳи хизматрасонии тиббӣ ва фароҳам овардани шароити мусоид барои аҳолӣ яке аз самтҳои афзалиятноки сиёсати давлатии соҳаи тандурустӣ ба ҳисоб меравад.
