Вазорати тандурустӣ ва ҳифзи иҷтимоии аҳолии Ҷумҳурии Тоҷикистон матлаби сомонаи Payk.tj-ро таҳти унвони “Вазири тандурустӣ таваллудхонаро бастааст, занҳои ҳомиладори коронавирус дар куҷо табобат гиранд?”, ки санаи 25 июни соли равон ба нашр расидааст, мавриди баррасӣ қарор дод.
Тавре дар матлаби мазкур омадааст: “Тибқи супориши вижаи вазири тандурустии ҷумҳурӣ Ҷамолиддин Абдуллозода дарҳои таваллудхонаи шаҳрии шаҳри Кӯлоб барои занони ҳомиладори гирифтори бемории Ковид-19 аз ин ба баъд бастааст”.
Дар робита ба ин, иттилоъ медиҳем, ки аз ҷониби Вазири тандурустӣ ва ҳифзи иҷтимоии аҳолии Ҷумҳурии Тоҷикистон ҳеҷ як супориши вижае дар робита ба бастани таваллудхонаи мазкур содир нашудааст ва ин ваҷҳи дар хабар дарҷгардида асоси воқеӣ надорад.
Инчунин, дар робита ба рӯшанӣ андохтан ба масъалаи мазкур мо бо Сардори раёсати тандурустии минтақаи Кӯлоб Садриддин Ғаюров ҳамсуҳбат шудем.
Тавре номбурда афзуд, тасмими мазкур танҳо ба хотири корҳои безараргардонӣ гирифта шуда буд. Инчунин, ҳамсуҳбати мо иброз дошт, ки рӯзҳои охир муроҷиати занҳои ҳомила бо нишонаи бемории КОВИД-19 ба таваллудхонаи мазкур ба қайд гирифта нашуда буд. Бо ин мақсад тасмим гирифта шуд, ки таваллудхонаро безарар намуда, онро барои баргаштан ба фаъолияти муқараррӣ омода намоянд. Аммо, мутаассифона, дар вақти гузаронидани корҳои безараргардонӣ дар таваллудхона, чор нафар зани ҳомиладор бо нишонии бемории КОВИД-19 ошкор карда шуданд. Ба ҳамин хотир, тасмим гирифта шуд, ки гумонбарони бемории мазкурро дар Беморхонаи сироятии шаҳри Кӯлоб як муддати муайян таҳти назорати табибони занона қарор бидиҳанд.
Мавриди зикр аст, ки аллакай баъди корҳои безараргардонӣ беморони болозикр ба Таваллудхонаи шаҳрии шаҳри Кӯлоб интиқол дода шуда, табобат гирифта истодаанд ва минбаъд занони ҳомиладоре, ки бо гумони сирояти КОВИД-19 дарфт мегарданд, дар таваллудхонаи мазкур ба табобат фаро гирифта хоҳанд шуд.
![](https://moh.tj/wp-content/uploads/2018/04/8678.jpg")
