Дар доираи сафари корӣ ба вилояти Суғд имрӯз, 18 июни соли равон дар шаҳри Хуҷанд муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Абдухолиқ Амирзода қабули сайёри шаҳрвандонро доир намуд.
Бояд гуфт, ки ҳадаф аз баргузории қабули сайёри шаҳрвандон-ин пеш аз ҳама суҳбати озоду ошкоро анҷом додан бо шаҳрвандон ва расидагӣ намудан ба масъалаву мушкилоти онҳо доир ба масъалаҳои тандурустӣ ва ҳифзи иҷтимоии аҳолӣ мебошад.
Абдухолиқ Амирзода бевосита шаҳрвандонро қабул ва бо онҳо суҳбати озоду ошкоро анҷом дода, баъд аз шунидани муроҷиати шаҳрвандон ҷиҳати ҳалли масъалаҳои эшон ба масъулин дастуру супоришҳои мушаххас дод.
Қайд кардан ба маврид аст, ки дар сиёсати давлат ва Ҳукумати мамлакат беҳтар намудани сатҳ ва сифати хизматрасонии тиббӣ ба аҳолӣ яке аз самтҳои муҳим ба шумор рафта, ҷиҳати фароҳам овардани шароити арзандаи фаъолият барои табибони кишвар имрӯзҳо дар муассисаҳои тандурустӣ шароит ва имконоти мусоид муҳайё карда шудааст.