6-уми майи соли равон аз ҷониби Намояндагии ЮНИСЕФ дар Ҷумҳурии Тоҷикистон ба Вазорати тандурустӣ ва ҳифзи иҷтимоии аҳолии Ҷумҳурии Тоҷикистон 227 адад мошини CИПАП (таҷҳизот барои таъмини фишори пайвастаи мусбати роҳҳои нафас) ва 300 адад консентратои оксигенӣ бо лавозимоти иловагӣ тақдим карда шуд.
Дар маросими тақдими таҷҳизотҳои мазкур муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Шодихон Ҷамшед, роҳбари Намояндагии ЮНИСЕФ дар Тоҷикистон ва шарикон оид ба рушд иштирок намуданд.
Зимни қабули таҷҳизот ва лавозимотҳои тиббӣ муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Шодихон Ҷамшед аз ҳамкориҳои судманди вазорат бо ЮНИСЕФ ёдовар шуда, кӯмаки навбатии ин ташкилоти бонуфузро идомаи ҳамкориҳои судманди дуҷониба арзёбӣ кард.
Қайд гардид, ки кӯмаки мазкур барои такмил ва баланд бардоштани иқтидори соҳа дар пешниҳоди ёрии тиббии марбут ба ҳалли мушкилоти роҳҳои нафаси навзодон ва таъмини чунин таҷҳизот ба шахсони эҳтиёҷманд равона карда шудааст.
Таҷҳизоти мазкур ба 73 муассисаҳои нигоҳубини неонаталӣ дар саросари кишвар тақсим карда, инчунин давраҳои омӯзишӣ доир ба нигоҳубини роҳҳои нафас ва истифодабарии таҷҳизот баргузор мегардад.
