Шоми 22 апрели соли ҷорӣ бо дастгирии Ҳукумати Ҷумҳурии Тоҷикистон, Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва мусоидати шарикони рушд ба соҳаи силшиносии кишвар 3 адад мошини сайёри флюорографии раќамӣ тақдим карда шуд. Ин мошинҳои сайёри флюорографии раќамӣ, ки аз навтарин таҷҳизоти ташхиси сил маҳсуб меёбанд, истеҳсоли Федератсияи Россия буда, бо маблағи 600 ҳазор доллари ИМА харидорӣ карда шудаанд.
Тавре Директори Муассисаи давлатии “Маркази ҷумҳуриявии ҳимояи аҳолӣ аз бемории сил” Раҷабзода Аслидин Саидбурҳон иттилоъ дод, таҷҳизотҳои ҷадиди силшиносӣ имконият медиҳанд, ки беморони сил саривақт ташхис ва ба табобат фаро гирифта шаванд. Номбурда афзуд, 3 мошини сайёри флюорографии раќами мазкур, ки бо тамоми лавозимоти муосир ҷиҳозонида шудаанд, ба се вилояти ҷумҳурӣ – Вилояти Мухтори Кӯҳистони Бадахшон, Хатлон ва Суғд тақдим шуда, метавонанд тамоми аҳолии кишварро аз ташхиси саривақтӣ гузаронанд.
Мавриди зикр аст, яке аз бартариҳои назарраси ин таҷҳизотҳо дар муқоиса бо таҷҳизотҳои пештара дар он аст, ки имкон доранд дар манотиқи кӯҳистони ҷумҳурӣ низ доимо фаъол бошанд ва дар як замону як макон, дар фосилаи кӯтоҳи вақт ташхисро анҷом диҳанд.
![](https://moh.tj/wp-content/uploads/2018/04/8678.jpg")
