Санаи 12-уми ноябри соли 2025 дар Агентии давлатии ҳифзи иҷтимоии аҳолии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон вохурии роҳбарияти Агентии мазкур бо гурӯҳи кории Бонки ҷаҳонӣ, ки бо ташрифоти хизматӣ ба Тоҷикистон омадааст, баргузор гардид.
Дар вохурӣ, директори Агентии давлатии ҳифзи иҷтимоии аҳолӣ Абдулло Сафарзода, менеҷери лоиҳаи “Лоиҳаи навсозии ҳифзи иҷтимоӣ ва ҳамгироии иқтисодӣ” (P178878) Ҷамшед Каримов иштирок доштанд.
Бояд гуфт, ки мақсади ташрифоти гурӯҳи кории Бонки ҷаҳонӣ ба Тоҷикистон-ин гузаронидани таҳлили миёнамуҳлати раванди амалишавии лоиҳаи “Навсозии ҳифзи иҷтимоӣ ва ҳамгироии иқтисодӣ” мебошад.
Дар идомаи вохурӣ аз ҷониби директори Агенти давлатии ҳифзи иҷтимоии аҳолӣ Абдулло Сафарзода доир ба ҷараёни амалишавии қисматҳои дахлдори лоиҳаи мазкур, хусусан оид ба пешравӣ ва иҷрои қарори Ҳукумати Ҷумҳурии Тоҷикистон аз 30 августи соли 2024, №488 “Дар бораи Тартиби таъин намудани кумакпулии унвонии иҷтимоӣ, муайян намудани андозаи он ва шаҳрвандон (оилаҳо)-и камбизоат дар Ҷумҳурии Тоҷикистон” ахборот дода шуд.
Зимнан, байни иштирокчиёни вохурӣ саволу ҷавобҳо ва табодули пешниҳодҳо оид ба фаъолияти минбаъда дар соли 2026 сурат гирифт.
Сипас, дар маҷлисгоҳи Агентии давлатии ҳифзи иҷтимоии аҳолӣ муаррифии натиҷаҳои тадқиқот оид ба баҳодиҳии сифатии барномаи кумакҳои унвонии иҷтимоӣ, ки аз ҷониби ташкилоти “Гендер ва тараққиёт” анҷом дода шудааст, пешниҳод гардид.
