16-уми майи соли равон дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон муовини якуми вазири тандурустӣ ва ҳифзи иҷтимоии аҳолӣ Ғафур Муҳсинзода бо як гурӯҳ ҷарроҳону табибони оилавии шаҳри Олтени Конфедератсияи Швейтсария вохурӣ намуд.
Муовини якуми вазири тандурустӣ ва ҳифзи иҷтимоии аҳолии мамлакат Ғафур Муҳсинзода сараввал меҳмононро ба бинои нави вазорат хайрамақдам гуфта, миннатдории роҳбарияти вазоратро барои ҳамкориҳои судманди дуҷониба дар раванди рушди соҳаи тандурустӣ ва ҳифзи иҷтимоии аҳолии Ҷумҳурии Тоҷикистон ба ҷониби Конфедератсияи Швейтсария изҳор намуд.
Қайд гардид, ки ҳадаф аз ташрифи мутахассисони Конфедератсияи Швейтсария ба Тоҷикистон-ин баррасии баимзорасонии ёддоштҳои тафоҳум дар самти кӯмаки аввалияи тиббию санитарӣ ба шумор меравад.
Дар идомаи вохурӣ ҷонибҳо доир ба густариши ҳамкориҳо дар дигар бахшҳои соҳаи тандурустӣ, аз ҷумла табодули таҷриба дар самти ташхису муоина мубодилаи афкор намуда, ҳавасмандии хешро ҷиҳати густариши ҳамкориҳои дуҷониба иброз доштанд.
