Дар доираи ташаббуси глобалӣ оид ба “Ҳафтаи пешгирии саратони гарданаки бачадон” аз 25 то 31-уми январи соли равон дар кишвар аз ҷониби Муассисаи давлатии «Маркази ҷумҳуриявии илмии саратоншиносӣ»-и Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ҳафтаи пешгирии саратони гарданаки бачадон гузаронида мешавад.
Бахшида ба ин иқдом 27-уми январи соли равон дар Муассисаи давлатии «Маркази ҷумҳуриявии илмии саратоншиносӣ» чорабинии иттилоотӣ доир гашт, ки дар он роҳбарият ва кормандони муассисаи мазкур иштирок намуданд.
Директори Маркази ҷумҳуриявии илмии саратоншиносӣ Акбар Муродзода чорабинии мазкурро ифтитоҳ намуда, доир ба таърихи пайдоиши ташаббуси глобалии “Ҳафтаи пешгирии саратони гарданаки бачадон”, сабабҳои пайдоиши бемории мазкур, роҳҳои пешгирӣ ва дигар паҳлуҳои он баромад кард.
Ҳамзамон, зимни чорабинии иттилоотӣ стратегияи Ташкилоти умумиҷаҳонии тандурустӣ оид ба мубориза бар зидди саратони гарданаки бачадон муаррифӣ шуда, дар баробари ин, иштирокчиён бо маълумоти омории расмӣ шинос карда шуданд, ки тибқи он давоми солҳои охир саратони гарданаки бачадон миёни кулли намудҳои бемориҳои онкологӣ мақоми аввалро дар ошкоршавӣ мегирад, дар ҳоле ки он бемории пешгиршаванда аст.
Дар идома як қатор мутахассисони соҳа низ доир ба паҳлуҳои гуногуни бемории саратони гарданаки бачадон баромад карда, ба иштирокчиён маълумоти зарурӣ ва муфид пешниҳод карданд.
Дар ин замина, қайд карда шуд, ки дар доираи баргузории ҳафтаи мазкур дар марказҳои солимии репродуктивии вилоятҳои Суғду Хатлон, ВМКБ ва шаҳру ноҳияҳои тобеи ҷумҳурӣ байни занон корҳои фаҳмондадиҳӣ гузаронида хоҳанд шуд.
