Бахшида ба Рӯзи касбии табибони Тоҷикистон ва зодрӯзи Шайхурраис Абуалӣ ибни Сино субҳи барвақти имрӯз, 18-уми августи соли равон аз ҷониби кормандони соҳаи тандурустӣ ва ҳифзи иҷтимоии аҳолии мамлакат дар Донишгоҳи давлатии тиббии Тоҷикистон ба номи Абуалӣ ибни Сино дар пояи муҷассамаи Абуалӣ ибни Сино гулчамбар гузошта шуд.
Дар маросими гулчамбаргузорӣ роҳбарияти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, Донишгоҳи давлатии тиббии Тоҷикистон ба номи Абуалӣ ибни Сино, Раёсати тандурустии шаҳри Душанбе ва доираи васеи кормандони соҳа иштирок намуданд.
Бояд гуфт, ки маросими гулчамбаргузорӣ дар пояи муҷассамаи фарзанди баруманди тоҷик, олим, табиб ва файласуфи машҳур Абуалӣ ибни Сино ба хотири гиромидошти хизматҳои беназираш дар рушди илми тиб ва арҷгузорӣ ба шахсияти нотакрори ӯ аз ҷониби кормандони соҳаи тандурустӣ ва ҳифзи иҷтимоии аҳолии кишвар баргузор гардид.
Қобили зикри хос аст, ки баъди ба даст овардани Истиқлолияти комили миллӣ баҳри қадршиносӣ ва азнав эҳё кардани осори ҷовидонаи фарзандони баруманди миллат таҳти сиёсати хирадмандонаи Президенти Ҷумҳурии Тоҷикистон муҳтарам Эмомалӣ Раҳмон дар кишвари мо чандин тадбирҳои муҳиму зарурӣ амалӣ гардиданд.
Аз ҷумла ба хотири гиромидошти шахсияти нобиғаи ҷаҳонӣ, фарзанди фарзонаи миллати тоҷик Абуалӣ ибни Сино дар Тоҷикистон ба исми мубораки ӯ номи донишгоҳ, ноҳия, ҷоизаи давлатӣ гузошта шудаву даҳҳо иқдому ташаббусҳои дигар низ амалӣ карда шудаанд.
Ёдовар мешавем, ки чорабинии бошукӯҳи идона бахшида ба Рӯзи касбии табибони Тоҷикистон ва 1045-солагии Абуалӣ ибни Сино имрӯз, соати 15:00 дар Филармонияи давлатии Тоҷикистон ба номи Акашириф Ҷӯраев баргузор мегардад.
