Дар ноҳияи Данғараи вилояти Хатлон бо иштироки роҳбарияти Мақомоти иҷроияи ҳокимияти давлатии ноҳияи Данғара ва сардори Раёсати ташкили хизматрасониҳои тиббӣ ба модару кӯдак ва танзими оилаи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон Зоир Набиев вобаста ба таҳлилу баррасии вазъи хизматрасонии тиббӣ ба модару кӯдак дар ноҳияи мазкур ҷаласаи корӣ доир шуд.
Дар ҷаласа ҳамзамон роҳбарият, кормандони Беморхонаи ҷумҳуриявии клиникии ноҳияи Данғара, Беморхонаи марказии ноҳияи Данғара ва мутахассисони соҳаи самти хизматрасонии тиббӣ ба модару кӯдак ширкат доштанд.
Дар ҷаласа сардори Раёсати ташкили хизматрасониҳои тиббӣ ба модару кӯдак ва танзими оилаи вазорат дастуру супоришҳои роҳбарияти Вазорати тандурустӣ ва ҳифзи иҷтимоии аҳолии кишварро дар самти боз ҳам беҳтар кардани сатҳу сифати хизматрасонии тиббӣ ба модару кӯдак самъи ҳозирин расонид.
Тавре таъкид гардид, масъалаҳои беҳтар кардани сатҳу сифати хизматрасонии тиббӣ ба модару кӯдак дар фаъолияти Вазорати тандурустӣ ва ҳифзи иҷтимоии аҳолӣ самти афзалиятнок ба шумор рафта, дар доираи дастгирӣ ва таваҷҷуҳи махсуси роҳбарияти олии давлату Ҳукумати мамлакат дар ин ҷода пайваста тадбирҳои муассир амалӣ мегарданд.
Дар идомаи ҷаласа фаъолияти муассисаҳои тандурустии болозикр ва шуъбаҳои онҳо дар давраи соли 2025 дар самти хизматрасонии тиббӣ ба модару кӯдак ҳамаҷониба таҳлилу баррасӣ карда шуда, баҳри боз ҳам беҳтар кардани фаъолият дар ин самт ба масъулин дастуру супоришҳои мушаххас дода шуд.
