22-юми апрели соли равон дар шаҳри Остонаи Ҷумҳурии Қазоқистон дар доираи ҷаласаи панелии вазирони тандурустии кишварҳои Тоҷикистон, Қазоқистон, Қирғизистон, Ӯзбекистон, Озарбойҷон, ки таҳти унвони “Ҳифзи наслҳои оянда: Саломатӣ дар маркази рӯзномаи экологӣ – дарсҳо ва роҳҳои ҳалли мушкилоти минтақаи баҳри Арал” доир гашт, эъломияи муштарак-“Ояндаи солим барои минтақаи баҳри Арал” ба имзо расид, ки дар он ҳамзамон директори минтақавии Ташкилоти умумиҷаҳонии тандурустӣ дар Аврупо Ҳанс Ҳенрӣ Клюге низ ширкат намуд.
Зимни имзои эъломияи мазкур гуфта шуд, ки ин ҳуҷҷат як қадами муҳим дар муайян кардани чораҳои афзалиятнок барои коҳиш додани хатарҳои экологӣ ба саломатии аҳолӣ ва тақвияти ҳамкории минтақавӣ ба манфиати наслҳои оянда хоҳад буд.
Тавре директори минтақавии Ташкилоти умумиҷаҳонии тандурустӣ дар Аврупо Ҳанс Ҳенрӣ Клюге дар ин маросим иброз дошт: “Баҳри Арал беш аз 90% ҳаҷми оби худро аз даст додааст. Ҷамоатҳое, ки дар атрофи он зиндагӣ мекунанд, даҳсолаҳо боз бо саломатии худ барои ин пардохт кардаанд. Ин изҳороти муштарак изҳороти нигаронӣ нест. Ин изҳороти амал аст. Имрӯз вазирони тандурустии Осиёи Марказӣ ва Озарбойҷон якҷоя бо ТУТ азми муштараки худро барои таъмини солимтар шудани наслҳои оянда дар минтақа нисбат ба гузашта тасдиқ мекунанд”.
