Бахшида ба Рӯзи Президенти Ҷумҳурии Тоҷикистон ва Иҷлосияи 16-уми Шӯрои Олии Ҷумҳурии Тоҷикистон аз ҷониби роҳбарияти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон як қатор табибони тоҷик, ки дар ҳудуди Федератсияи Россия кору фаъолият менамоянд, бо Сипоснома қадрдонӣ гаштанд.
Чунин қадрдонӣ барои табибоне, ки дар баланд бардоштани обруи тибби тоҷик дар кишвари Федератсияи Россия, таъмини ҳифзи саломатии муҳоҷирони меҳнатии Ҷумҳурии Тоҷикистон дар ин мамлакат ва ҳамзамон дар таҳкими равобити дӯстона ва бародаронаи Тоҷикистону Россия саҳми хешро гузоштаанд, амалӣ гардид.
Маросими тақдими сипосномаҳо аз ҷониби Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар Федератсияи Россия дар манотиқи гуногуни ин кишвар доир гашт.
Бояд гуфт, ки зимни маросимҳои қадрдонӣ намояндагони созмонҳои ҷамъиятии Тоҷикистон, муассисаҳои дипломатӣ ва консулгарӣ ва ҳамкорони рус иштирок намуда, аз маҳорати баланди касбӣ, масъулиятшиносӣ ва садоқати шаҳрвандии мутахассисони тоҷик изҳори қаноатмандӣ карданд.
