13 сентябри соли равон дар шаҳри Душанбе вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода бо Ҳанс Клюге, директори минтақавии Дафтари ТУТ оид ба кишварҳои Аврупо, ки бо сафари корӣ дар Тоҷикистон қарор дорад, мулоқот намуд.
Нахуст Ҷамолиддин Абдуллозода, вазири тандурустӣ ва ҳифзи иҷтимоии аҳолии мамлакат Ҳанс Клюгеро ба Тоҷикистони биҳиштосо хайрамақдам намуда, барои дастгириҳои пайвастаи соҳа ба ТУТ изҳори миннатдорӣ баён дошт.
Қайд гардид, ки дар Ҷумҳурии Тоҷикистон солимии аҳолӣ дар маркази диққати давлат ва Ҳукумати мамлакат қарор дошта, баҳри беҳтар намудани сатҳ ва сифати хизматрасонии тиббӣ ба сокинон дар кишвар як қатор тадбирҳои муҳиму саривақтӣ амалӣ карда шудаанд ва корҳо дар ин самт бомаром идома доранд.
Дар идомаи мулоқот ҷонибҳо доир ба «Харитаи роҳ оид ба саломатӣ ва некӯаҳволӣ дар Осиёи Марказӣ барои солҳои 2022-2025» мубодилаи афкор намуда, таҳияи чунин як ҳуҷҷати муҳимро баҳри беҳтар намудани вазъи солимии аҳолӣ дар минтақа муҳим арзёбӣ намуданд.
Баъдан Ҷамолиддин Абдуллозода ва Ҳанс Клюге ба Маҷмааи тандурустии “Истиқлол” ташриф оварда, дар машварати маҷозӣ бо коршиносони ТУТ иштирок ва суханронӣ карданд.
![](https://moh.tj/wp-content/uploads/2018/04/8678.jpg")
