28-уми марти соли равон дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон таҳти роҳбарии вазири тандурустӣ ва ҳифзи иҷтимоии аҳолӣ Ҷамолиддин Абдуллозода вобаста ба вусъат бахшидани маъракаи ваксинатсия бар зидди бемориҳои сироятӣ дар шаҳри Душанбе ҷаласаи корӣ доир гашт.
Дар ҷаласаи мазкур муовини вазир Абдухолиқ Амирзода, роҳбарияти Хадамоти назорати давлатии санитарию эпидемиологӣ, Раёсати тандурустии шаҳри Душанбе, сардорони раёсату шуъбаҳои дастгоҳи марказӣ ва роҳбарони марказҳои саломатӣ ва марказҳои назорати давлатии санитарию эпидемиологии шаҳри Душанбе иштирок намуданд.
Ҷаласаро вазири тандурустӣ ва ҳифзи иҷтимоии аҳолӣ ифтитоҳ намуда, доир ба ҷараёни маъракаи ваксинатсия бар зидди бемориҳои сироятӣ дар байни аҳолӣ, зарурати гирифтани ваксинатсия ва дигар масъалаҳои алоқаманди он баромад кард.
Дар ин замина, ҷиҳати бартараф намудани мушкилоту камбудиҳои ҷойдоштаи соҳа ва боз ҳам беҳтар кардани маъракаи ваксинатсия бар зидди бемориҳои сироятӣ дар байни аҳолӣ аз ҷониби вазири тандурустӣ ва ҳифзи иҷтимоии аҳолӣ Ҷамолиддин Абдуллозода ба масъулин дастуру супоришҳои мушаххас дода шуд.
