Аз 19 то 23-юми майи соли равон дар Ҷумҳурии Халқии Демократии Алҷазоир ҷаласаи солонаи Бонки Исломии Рушд ва чорабиниҳои канории Барномаи ҳаёт ва воситаҳо барои ҳаёт (LLF) доир гашт, ки дар он вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода иштирок ва суханронӣ намуд.
Бояд гуфт, ки дар доираи ҳамкорӣ бо Бонки Исломии Рушд дар кишвар лоиҳаи “Беҳтар намудани хизматрасонӣ барои модар ва кӯдак дар чор ноҳияи вилояти Хатлон” бо муваффақият ба анҷом расида, ҷиҳати пайгирии дастуру супоришҳои Ҳукумати Ҷумҳурии Тоҷикистон оид ба пурзӯр намудани назорати вориди доруҳои пастсифат ва қалбакӣ ва ба роҳ мондани истеҳсоли маҳсулоти дорувории ватанӣ лоиҳаи “Пурзӯр намудани кӯмаки аввалияи тиббию санитарӣ тавассути назорати миллии сифати дору ва маҳсулоти хӯрокворӣ дар Ҷумҳурии Тоҷикистон” таҳия гардидааст.
Қайд кардан ба маврид аст, ки барои рушду густариши ҳамкорҳои Тоҷикистон бо Бонки Исломии Рушд дар соҳаи тандурустӣ тамоми шароиту имкониятҳои зарурӣ муҳайё мебошанд ва ин ҳамкориҳо ҷиҳати боз ҳам беҳтар намудани сатҳу сифати хизматрасонии тиббӣ ба аҳолӣ мусоидат хоҳанд кард.
Дар ҷаласаи канорӣ оид ба саҳми Барномаи ҳаёт ва воситаҳо барои ҳаёт ва музокироти интерактивӣ вазири тандурустӣ ва ҳифзи иҷтимоии аҳолии мамлакат ва ҳамзамон вазирони тандурустии ҷазираи Малдив ва Серра Леон низ иштирок намуданд.
