Дар вилояти Суғд ҷаласа вобаста ба пурра гузаштан ба системаҳои электронии бақайдгирии таваллуд, фавт, ваксинатсия ва дигар модулҳои иттилоотии соҳаи тандурустӣ, инчунин омодабошии муассисаҳои тиббӣ барои ҷорӣ намудани модулҳои нави электронӣ баргузор гардид.

Ҷаласа таҳти роҳбарии Муовини Вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҳабибулло Хайруллозода ва Директори Муассисаи давлатии “Маркази ҷумҳуриявии омор ва иттилооти тиббӣ” Шамсуллозода Манучеҳр доир шуд.

Дар кори ҷаласа роҳбарони ҳамаи муассисаҳои тиббии вилояти Суғд иштирок намуда, масъалаҳои марбут ба сатҳи омодагии муассисаҳо, ҳолати татбиқи системаҳои электронӣ, мушкилоти мавҷуда ва тадбирҳои иловагӣ барои таъмини гузариши пурра ба платформаҳои рақамӣ мавриди баррасӣ қарор гирифтанд.

Қайд гардид, ки ҷорӣ намудани системаҳои электронии иттилоотӣ ба баланд бардоштани сифат ва шаффофияти маълумот, таъмини саривақтии таҳлил, беҳтар гардидани қабули қарорҳои идоракунӣ ва коҳиш додани сарбории маъмурӣ мусоидат менамояд.

Дар анҷоми ҷаласа ба роҳбарони муассисаҳои тиббӣ дастуру супоришҳои мушаххас ҷиҳати тақвияти чораҳои омодагӣ ва таъмин намудани гузариши пурра ба модулҳои нави электронии соҳаи тандурустӣ дода шуд.