Беҳтар намудани сатҳ ва сифати хизматрасонии тиббӣ ба аҳолӣ дар маркази диққати роҳбарияти олии Ҳукумати Тоҷикистон қарор дошта, тайи солҳои соҳибистиқлолии давлатӣ дар ин самт корҳои муҳиму назаррас ба анҷом расонида шудаанд.
Бо мақсади аз наздик шиносоӣ пайдо намудан бо рафти хизматрасонии тиббӣ ба аҳолӣ, таҳлил ва баррасии амиқи масъалаву мушкилоти ҷойдоштаи соҳа роҳбарияти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон пайваста ба шаҳру навоҳии мамлакат сафар намуда, бо фаъолияти муассисаҳои тандурустӣ шинос мешавад.
Имрӯз, 12-уми феврали соли равон вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода ба шаҳри Ҳисор сафари корӣ анҷом дода, бо фаъолият ва корҳои ободониву созандагӣ муассисаҳои тандурустӣ шинос гашт.
Дар доираи сафари кории хеш номбурда аз Маркази саломатии шаҳри Ҳисор дидан кардаву бо фаъолияти шуъбаҳо, ҳолати таҷҳизотҳои тиббӣ ва шароиту имкониятҳои он шинос гашта, баҳри боз ҳам беҳтар кардани сатҳу сифати хизматрасонии тиббӣ ба аҳолӣ ба роҳбарият ва кормандони он дастуру супоришҳои мушаххас дод.
Ҳамзамон вазири тандурустӣ ва ҳифзи иҷтимоии аҳолӣ аз рафти сохтмон ва азнавсозии шуъбаи бемориҳои пуст ва зуҳравии Беморхонаи марказии шаҳри Ҳисор низ дидан кард.
Баъдан, зимни суҳбат бо масъулини соҳаи тандурустии шаҳри Ҳисор Ҷамолиддин Абдуллозода як қатор масъалаҳои муҳими соҳа, аз қабили пешгирии фавти модару кӯдак, таъминотнокӣ бо мутахассисони соҳа ва ба курсҳои бозомузиву давраҳои омӯзишӣ фаро гирифтани табибон, ба роҳ мондани усулҳои нави ташхису табобат, назорати қатъии беморон, аз ҷумла беморони дар ҳолати вазнин қарор дошта, саривақт ҷавоб додан ба муроҷиати шаҳрвандон, истифодаи дурусти таҷҳизотҳои тиббӣ, боз ҳам беҳтар кардани фаъолияти кӯмаки аввалияи тиббию санитарӣ, аз ҷумла ёрии таъҷилӣ ва дигар масъалаҳоро баррасӣ намуда, баҳри рафъи мушкилоту камбудиҳои ҷойдоштаи соҳа ба роҳбарияти муассисаҳои тандурустии шаҳри мазкур дастуру супоришҳои мушаххас дод.
