16-уми апрели соли равон дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон мулоқоти муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҳабибулло Хайруллозода бо Сафири фавқулода ва мухтори навтаъини Ҷумҳурии Арабии Миср дар Ҷумҳурии Тоҷикистон амир Фатҳӣ Абдусалом Ҳаммод баргузор гардид.

Нахуст муовини вазири тандурустӣ ва ҳифзи иҷтимоии аҳолии кишвар амир Фатҳӣ Абдусалом Ҳаммодро ба муносибати оғози фаъолияти дипломатиаш дар Ҷумҳурии Тоҷикистон табрик намуда, ба ӯ дар иҷрои рисолати масъулиятнокаш ҷиҳати таҳкими муносибатҳои дӯстонаи ду кишвар муваффақиятҳо таманно кард.

Дар ҷараёни мулоқот ҷонибҳо доираи васеи масъалаҳои ҳамкориҳои дуҷонибаро дар соҳаи тандурустӣ ва ҳифзи иҷтимоии аҳолӣ мавриди баррасӣ қарор доданд. Аз ҷумла, ҷонибҳо ҷиҳати боз ҳам тақвият бахшидани саноати дорусозӣ дар асоси Ёддошти тафоҳуми байниҳукуматии мавҷуда ҳавасмандии хешро баён намуданд.

Зикр шуд, ки рушди ин бахш заминаи мусоидро барои таъмини амнияти фармасевтӣ ва табодули технологияҳои муосир фароҳам меорад. Ҳамзамон, ҷонибҳо ба масъалаи таҳкими иқтидори кадрии соҳа таваҷҷуҳи махсус зоҳир намуда, омодагии хешро барои баргузории давраҳои омӯзишӣ ва такмили ихтисоси мутахассисони соҳаи тибби Тоҷикистон дар муассисаҳои илмию таълимии Ҷумҳурии Арабии Миср иброз доштанд.

Таъкид гардид, ки ҳамкориҳо дар самтҳои саратоншиносӣ, эндокринология ва дорусозӣ (фарматсия) аз афзалиятҳои асосии ҳамкориҳои дуҷониба маҳсуб меёбанд.

Ҳамин тавр, дар анҷоми мулоқот ҷонибҳо омодагии хешро барои густариши минбаъдаи муносибатҳои мутақобилан судманд ва татбиқи нақшаҳои муштарак дар соҳаи тандурустӣ баён доштанд.