17-уми октябри соли равон дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ҷаласаи навбатии ҳайати мушовараи Вазорати тандурустӣ ва ҳифзи иҷтимоии аҳолӣ вобаста ба натиҷагирӣ аз фаъолияти вазорат ва зерсохторҳои он дар 9 моҳи соли 2026 ва вазифаҳо то охири соли 2026 баргузор гашт, ки дар кори он вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода, муовини якуми вазир Саломуддин Юсуфӣ, муовинони вазир Зулфия Абдусаматзода, Абдухолиқ Амирзода, Ҳабибулло Хайруллозода, ректори Донишгоҳи давлатии тиббии Хатлон Убайдулло Қурбон, директори Агентии давлатии ҳифзи иҷтимоии аҳолӣ Абдулло Сафарзода, сардорони хадамотҳои соҳавӣ, сардорони раёсат ва шӯъбаҳои дастгоҳи марказии вазорат, сардорони раёсатҳои тандурустии шаҳри Душанбе, ВМКБ, вилоятҳои Суғду Хатлон, роҳбарони муассисаҳои ҷумҳуриявӣ ва шаҳру ноҳияҳои мамлакат иштирок намуданд.
Нахуст вазири тандурустӣ ва ҳифзи иҷтимоии аҳолии мамлакат Ҷамолиддин Абдуллозода вобаста ба фаъолияти вазорат ва зерсохторҳои он дар давоми 9 моҳи соли 2026 маълумот дод.
Гуфта шуд, ки дар давраи сипаригардида дар ҷумҳурии мо як қатор рӯйдодҳои муҳими таърихӣ ба вуқуъ пайваст, ки дар байни онҳо 35-солагии Истиқлолияти давлатӣ бисёр муҳиму таърихӣ буда, он бо дастовардҳои арзанда дар тамоми соҳаҳои иҷтимоиву иқтисодии кишвари азизамон бо тантана ҷашн гирифта шуд. Тавре Асосгузори сулҳу ваҳдати миллӣ-Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон қайд намуданд: “Тамоми дастовардҳои сиёсиву иқтисодӣ, фарҳангиву иҷтимоӣ ва пешрафти устувори Тоҷикистон аз истиқлоли давлатӣ ва иҷлосияи таърихии 16-уми Шурои Олӣ сарчашма мегиранд”.
Дар ҳамин замина қайд гардид, ки ҳадафи асосии ҳуҷҷатҳои бунёдии соҳаҳои тандурустӣ ва ҳифзи иҷтимоии аҳолӣ-ин беҳтар намудани сифат ва дастрасии хизматрасониҳои тиббӣ ва иҷтимоӣ ба аҳолии кишвари азизамон мебошад. Бо ин мақсад, дар нуҳ моҳи соли 2026 фаъолияти вазорат ба иҷрои вазифаҳои соҳавӣ, таҳкими заминаи ҳуқуқӣ, рушди хизматрасониҳо ва истифодаи самараноки имкониятҳои мавҷуда равона гардид.
Дар давраи ҳисоботӣ ҷиҳати таҳкими заминаи ҳуқуқии соҳа 23 лоиҳаи қарори Ҳукумати Ҷумҳурии Тоҷикистон ва як лоиҳаи қонун таҳия ва барои баррасӣ пешниҳод гардида, 22 қарор ва як қонун қабул шудаанд. Аз ҷумла, қонуни Ҷумҳурии Тоҷикистон «Дар бораи таъмини ҳуқуқ ва ҳифзи иҷтимоии шахсони маъюбиятдошта», қарорҳои дахлдор доир ба барномаҳои иммунопрофилактика, ҳимояи аҳолӣ аз бемории сил, рушди донорӣ, рушди саноати фарматсевтӣ, пешгирӣ ва назорати диабети қанд барои солҳои 2026–2030, оид ба масъалаҳои Ҷоизаи байналмилалии Абуалӣ ибни Сино дар соҳаи тиб, тартиби таъини кумакпулии давлатӣ ба кӯдакони гирифтори ВНМО қабул шуданд.
Бо мақсади беҳтаркунии инфрасохтори муассисаҳои тандурустӣ дар 9 моҳи соли 2026 аз ҳама сарчашмаҳо 104 муассисаҳо, аз ҷумла 86 муассисаи КАТС, 12 муассисаи госпиталӣ ва 6 муассисаи хусусӣ сохта шудааст. Дар баробари ин, айни замон дар 71 муассиса (46 муассисаи КАТС, 17 муассисаи госпиталӣ ва 8 муассисаи хусусӣ) корҳои сохтмонӣ идома доранд. Дар ин давра 145 муассисаҳо (98 муассисаи КАТС ва 47 муассисаи госпиталӣ) таъмир гардида, дар 101 муассиса (57 адад муассисаҳои КАТС, 34 адад муассисаи госпиталӣ ва 10 адад муассисаи хусусӣ) корҳои таъмирӣ идома доранд.
Инчунин, дар давраи ҳисоботӣ 40 навгонӣ, аз ҷумла ҳафт навгонӣ дар ташхис ва 33 навгонӣ дар табобат ҷорӣ гардидааст. Дар самти ташхис истифодаи зеҳни сунъӣ барои арзёбии вайроншавии назми дил ва бемориҳои шабакия, томографияи компютерии шоҳраг ва сохторҳои дил бо ҳамоҳангсозии электрокардиографӣ, инчунин усулҳои нави ташхис дар эндокринология ва рентгенология ба роҳ монда шуданд.
Дар самти таъмини амнияти санитарию эпидемиологӣ назорати бемориҳои сироятӣ ва чорабиниҳои пешгирикунанда идома ёфтанд. Дар давраи ҳисоботӣ бемориҳои домана, паратифҳо, полиомиелит, гулафшон, гулӯзиндонак, лептоспироз, вабо ва тоун ба қайд гирифта нашудаанд.
Дар давраи ҳисоботӣ 5 ҳазору 540 санҷиши санитарию эпидемиологӣ гузаронида шуда, барои риоя накардани талаботи санитарию эпидемиологӣ нисбат ба 7 ҳазору 384 шахси масъул протоколҳои ҳуқуқвайронкунии маъмурӣ тартиб дода шудааст.
Дар нуҳ моҳи соли 2026 дар муассисаҳои тандурустӣ 22 ҳазору 766 табиб ва 65 ҳазору 588 корманди миёнаи тиббӣ фаъолият мекунанд. Тибқи маълумоти пешакӣ, банд будани воҳидҳои кории табибон 96,3 фоиз ва кормандони миёнаи тиббӣ 99,8 фоизро ташкил медиҳад. Ин нишондиҳандаҳо тавсифи умумии таъминот буда, барои арзёбии вазъ дар ҳар минтақа ва ихтисос таҳлили ҷудогонаро талаб менамояд.
Дар давраи ҳисоботӣ 1 ҳазору 394 табиб ва 3 ҳазору 400 корманди миёнаи тиббӣ ба аттестатсия фаро гирифта шуданд, ки нисбат ба ҳамин давраи соли гузашта мутаносибан 722 ва 116 нафарӣ зиёд мебошад.
Инчунин, дар муассисаҳои илмию таълимии вазорат 19 ҳазору 74 корманди соҳа ба таҳсилоти баъдидипломӣ фаро гирифта шуданд, ки нисбати соли гузашта 3 ҳазору 137 нафар зиёд аст.
Дар низоми ҳифзи иҷтимоии аҳолии вазорат 240 ташкилоту муассиса фаъолият карда, шумораи кормандони онҳо 4 ҳазору 648 нафарро ташкил медиҳад. Ба ҳолати 25 сентябри соли 2026 дар ҳафт хона-интернат 1 ҳазору 353 бошанда, аз ҷумла 750 мард, 534 зан ва 69 кӯдаки маъюб дар нигоҳубини давлатӣ қарор доранд.
Зимни баромади хеш вазири тандурустӣ ва ҳифзи иҷтимоии аҳолӣ Ҷамолиддин Абдуллозода вобаста ба фаъолияти тамоми самтҳои соҳа дар давраи ҳисоботӣ маълумот пешниҳод кард.
Баъдан, сардорони раёсатҳои тандурустии шаҳри Душанбе, ВМКБ, вилоятҳои Суғду Хатлон ва роҳбарони дигар сохторҳои соҳавӣ низ вобаста ба фаъолияти хеш дар давраи мазкур ҳисобот доданд.
Пас аз шунидани ҳисоботи масъулин як қатор масъалаҳои муҳими соҳа, аз ҷумла таъминоти кадрии муассисаҳои тандурустӣ, баланд бардоштани донишу малакаи касбии мутахассисон, омодагии ҳамаҷониба ба зимистонгузаронӣ, пешгирии бемориҳои сироятиву ғайрисироятӣ, иҷрои саривақтӣ ва босифати барномаҳои давлатӣ, ворид намудани усулҳои нави ташхису табобат, пешгирии амалҳои номатлуб, пешгирии фавти модару кӯдак, одоби муошират бо беморон, вусъат бахшидани корҳои ободониву созандагӣ, аз ҷумла сохтмон ва таъмиру таҷдиди муассисаҳои тандурустӣ ва дигар масъалаҳо мавриди таҳлилу баррасӣ қарор дода шуданд.
Дар фарҷоми ҷаласа вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода ҷиҳати боз ҳам беҳтар намудани хизматрасонии тиббӣ ба аҳолӣ, беҳтар намудани сифати хизматрасонии кӯмаки аввалияи тиббӣ, омодагӣ барои муътадил гузаронидани давраи зимистон, риояи қатъии қоидаҳои санитарию эпидемиологӣ дар муассисаҳои тандурустӣ ва ҳифзи иҷтимоии аҳолӣ, ҷавоб додан ба муроҷиати шаҳрвандон ва баҳри бартараф намудани мушкилот ва камбудиҳои ҷойдоштаи соҳа ба тамоми масъулон-роҳбарони муассисаҳои тандурустии кишвар супоришҳои қатъӣ доданд.
