Бо мақсади аз наздик шиносоӣ пайдо намудан бо фаъолияти муассисаҳои тандурустӣ, рафти хизматрасонии тиббӣ ба аҳолӣ, аз ҷумла ба модару кӯдак сардори Раёсати ташкили хизматрасониҳои тиббӣ ба модару кӯдакон ва танзими оилаи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон Зоир Набиев аз фаъолияти Таваллудхонаи вилояти Суғд ва Беморхонаи клиникавии вилоятии шаҳри Хуҷанд дидан ба амал овард.
Дар муассисаҳои тандурустии болозикр сардори Раёсати ташкили хизматрасониҳои тиббӣ ба модару кӯдакон ва танзими оилаи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон Зоир Набиев бо масъулини беморхонаҳо доир ба боз ҳам беҳтар ба роҳ мондани сатҳу сифати хизматрасонии тиббӣ ба аҳолӣ, бартараф намудани мушкилоту камбудиҳои ҷойдошта, пешгирии фавти модару кӯдак суҳбат кард.
Дар идомаи боздиди хеш номбурда ҳамзамон дар муассисаҳои мазкур бо як қатор беморон низ суҳбат анҷом дода, аз онҳо доир ба сатҳу сифати хизматрасонии тиббӣ, одоби муошират пурсон шуд.
Қайд кардан ба маврид аст, ки масъалаҳои хизматрасонии тиббӣ ба аҳолӣ, аз ҷумла ба модару кӯдак яке аз самтҳои афзалиятноки Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба шумор рафта, баҳри боз ҳам беҳтар ба роҳ мондани хизматрасонӣ дар ин бахш пайваста чораҳои муҳиму саривақтӣ амалӣ карда мешаванд.
