Директори минтақавии Дафтари Созмони умумиҷаҳонии тандурустӣ оид ба давлатҳои Аврупо Ҳанс Клюге вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозодаро барои нашри бомуваффақияти мақола оид ба натиҷаҳои таҳлили бозори меҳнат дар соҳаи тандурустии Тоҷикистон дар маҷаллаи бонуфузи “BioMed Central” табрик намуд.
Иқдоми мазкур аз ҷониби Вазорати тандурустӣ ва ҳифзи иҷтимоии аҳолии Тоҷикистон ва дар ҳамкорӣ бо Созмони умумиҷаҳонии тандурустӣ як қадами муҳим буд, ки муносибати ҳамаҷониба ба такмили системаи тандурустии кишварро инъикос мекард.
“Ин натиҷаи саъю кӯшиши муштараки коршиносон ва мутахассисон дар ҳар се сатҳи ТУТ мебошад ва аҳамияти таҳлили бозори меҳнатро ҳамчун воситаи таҳияи сиёсати муассири соҳаи тандурустӣ таъкид мекунад. Ҳадафи нашрия ба муайян кардани мушкилот ва имкониятҳои асосии системаи тандурустии Тоҷикистон ва пешниҳоди тавсияҳо барои беҳбудии хизматрасонии тиббии муассисаҳои тандурустӣ равона шудааст”, – иброз дошт Ҳанс Клюге.
Нашри мавод дар маҷаллаи бонуфӯзи “BioMed Central” имкониятҳои соҳаи тибби кишварро барои ворид кардани равишҳои нави илмӣ ва амалияи тандурустӣ тасдиқ мекунад, ки ин як қадами зарурӣ барои таъмини рушди устувор ва беҳбуди саломатии аҳолӣ мебошад.
Мавриди зикр аст, ки ба имзорасонии Стратегияи ҳамкорӣ бо ТУТ ба Тоҷикистон имкон медиҳад, ки на танҳо табодули таҷриба, балки ҷалби таҷрибаи байналмилалӣ барои ҳалли масъалаҳои мубрами соҳаи тандурустиро ба даст орад.
