Аз 5 то 7-уми майи соли 2025 дар шаҳри Кейптауни Ҷумҳурии Африқои Ҷанубӣ ҷаласаи сатҳи баланди кишварҳои узви Фонди Маблағгузории Глобалӣ (ФМГ) баргузор гардид, ки дар он аз тарафи Ҷумҳурии Тоҷикистон муовини якуми вазири тандурустӣ ва ҳифзи иҷтимоии аҳолӣ Ғафур Муҳсинзода ва муовини якуми вазири молия Юсуф Маҷидӣ иштирок намуданд.

Дар ҷаласаи мазкур ҳайати Ҷумҳурии Тоҷикистон рафти иҷрои Нақшаи чорабиниҳои афзалиятнок барои солҳои 2024-2026-ро муаррифӣ кард, ки самтҳои асосии зеринро дарбар мегирад: беҳтар намудани дастрасӣ, сифат ва мутобиқати хизматрасониҳои кӯмаки аввалияи тиббию санитарӣ (КАТС), маблағгузории устувор, системаҳои иттилоотии идоракунии тандурустӣ ва самти рақамкунонии соҳа ва таъмини рушди устувори захираҳои инсонӣ.

Дар доираи иштирок дар ин чорабинӣ Ғафур Муҳсинзода, муовини якуми вазири тандурустӣ ва ҳифзи иҷтимоии аҳолии Ҷумҳурии Тоҷикистон бо роҳбари Котиботи Фонди Маблағгузории Глобалӣ ҷаноби Люк Лавиолет мулоқот намуда, дар рафти он дурнамои тавсеаи сандуқи сармоягузориро ҷиҳати таҳкими системаи тандурустии Тоҷикистон ва рушди минбаъдаи шарикӣ бо ин фонд ва Бонки ҷаҳонӣ баррасӣ кард. Зимни вохурӣ масъалаҳои ҷалби донорҳои дигар бо иштироки ФМГ барои афзоиши ҳаҷми маблағгузорӣ ба соҳаи тандурустии кишвар низ баррасӣ гаштанд.

Илова бар ин, ҳайати Тоҷикистон дар таҳияи Стратегияи Фонди Маблағгузории Глобалӣ барои солҳои 2026-2030, ки ҳадафҳои асосии он сафарбар намудани маблағгузории устувор ба кишварҳои аъзо, нигоҳ доштани натиҷаҳои ба даст омада дар соҳаи ҳифзи саломатии занон, кӯдакон ва наврасон, васеъ намудани равишҳои инноватсионии собитшуда ва коҳиш додани вобастагӣ аз кӯмаки беруна мебошад, иштирок намуд.