Имрӯз, 13-уми марти соли равон вазири тандурустӣ ва ҳифи иҷтимоии аҳолии Ҷумҳурии Тоҷикистон Ҷамолиддин Абдуллозода ба Маркази саломатии шаҳрии Ҳисор ташриф овард.

Аснои боздид вазири тандурустӣ ва ҳифзи иҷтимоии аҳолӣ Ҷамолиддин Абдуллозода бо рафти хизматрасонии тиббии Маркази саломатии шаҳрии Ҳисор шинос гашта, аз ҷараёни фаъолияти шуъбаҳои он дидан кард.

Баъдан, дар маҷлисгоҳи маркази саломатии мазкур бо иштироки вазири тандурустӣ ва ҳифзи иҷтимоии аҳолӣ Ҷамолиддин Абдуллозода ва ҳайати кормандони ин муассисаи тандурустӣ оид ба боз ҳам беҳтар кардани вазъи хизматрасонии тиббӣ ба модару кӯдак ҷаласаи назоратӣ доир гардид.

Вазири тандурустӣ ва ҳифзи иҷтимоии аҳолӣ таваҷҷуҳи ҳозиринро ба масъалаҳои пешгирии фавти модару кӯдак ва беҳтар кардани сатҳу сифати хизматрасонии тиббӣ дар ин самт ҷалб кард.

Дар ин замина, гуфта шуд, ки бо мақсади расонидани кумаки дастурию методӣ ҷиҳати пешгирии фавти модару кӯдак гурӯҳи корӣ дар шаҳри Ҳисор фаъолияти хешро оғоз намуда, бо кормандони муассисаҳои тандурустии шаҳр корбарӣ менамояд.

Дар ҷаласаи назоратӣ ҳамзамон ҷиҳати баланд бардоштани сатҳи саводу салоҳият ва малакаҳои касбии кормандон, хусусан кормандони миёнаи тиб тариқи гузаронидани машғулиятҳои семинарӣ ва амалӣ, пешгирии омилҳои коррупсионӣ дар байни кормандони тиб, анҷом додани гардишҳои сифатноки хонагӣ ва беҳтар намудани хизматрасонии тиббӣ ба масъулин дастуру супоришҳои мушаххас дода шуд.