18-уми октябри соли равон дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон вазири тандурустӣ ва ҳифзи иҷтимоии аҳолии мамлакат Ҷамолиддин Абдуллозода бо мақсади боз ҳам густариш бахшидани ҳамкориҳои дуҷониба бо як гурӯҳ мутахассисони соҳаи тандурустӣ аз Ҷумҳурии Исломии Эрон вохурӣ намуд.
Боиси қаноатмандист, ки давоми солҳои охир дар заминаи сиёсати созандаи роҳбарони сатҳи олии ду кишвар дар баробари дигар самту соҳаҳои ҳаётан муҳим ҳамкориҳои Ҷумҳурии Тоҷикистон ва Ҷумҳурии Исломии Эрон низ дар соҳаи тандурустӣ ва ҳифзи иҷтимоии аҳолӣ густариш ёфта, ҳоло дар марҳилаи нави рушд қарор доранд.
Аз ҷумла ҳамкориҳои ду кишвар дар самтҳои гуногуни ҷарроҳӣ, табодули таҷриба ва бозомузиии мутахассисони Тоҷикистон дар ин кишвар, ҳамкорӣ дар бахши дорусозӣ, ҳифзи иҷтимоӣ ва дигар бахшҳои муҳими соҳа айни ҳол хуб ба роҳ монда шуда, хушбахтона натиҷаҳои назаррас ба даст омада истодаанд.
Зимни вохурӣ масъалаҳои омӯзишу пажӯҳиши системаи тандурустии мамлакат ва мутобиқсозӣ ба стандартҳои байналмилалӣ, омӯзиши мутахассисон ва дигар самтҳои мавриди таваҷҷуҳи тарафайн баррасӣ гаштанд.
