Имрӯз, 12-уми июни соли равон дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон вазири тандурустӣ ва ҳифзи иҷтимоии аҳолӣ Ҷамолиддин Абдуллозода бо Сафири Ҷумҳурии Исломии Покистон дар Ҷумҳурии Тоҷикистон Ирфан Аҳмад вохурӣ намуд.
Вазири тандурустӣ ва ҳифзи иҷтимоии аҳолии мамлакат Ҷамолиддин Абдуллозода зимни вохурӣ иброз дошт, ки Тоҷикистон ва Покистонро муносибатҳои анъанавии дӯстӣ, эҳтироми мутақобил ва ҳамдигарфаҳмӣ ба ҳам мепайванданд.
Номбурда ҳамзамон зикр кард, ки “муносибатҳои дипломатии ду кишвар дар солҳои охир дар партави сиёсати роҳбарияти олии давлатҳо пайваста рушд ёфта, ҳамкорӣ дар соҳаҳои гуногун, аз ҷумла тандурустӣ, маориф, иқтисод ва фарҳанг густариш меёбад”.
Дар ин замина, қайд карда шуд, ки соҳаи тандурустӣ яке аз самтҳои муҳими ҳамкории дуҷониба байни кишварҳо ба шумор рафта, Вазорати тандурустӣ ва ҳифзи иҷтимоии аҳолии Ҷумҳурии Тоҷикистон омодааст, ки ҳамкориҳоро бо ниҳодҳои дахлдори Покистон дар тамоми самтҳои афзалиятноки соҳа тақвият бахшад.
Аз ҷумла гуфта шуд, ки яке аз самтҳои муҳими ҳамкорӣ метавонад таҳкими робитаҳо байни муассисаҳои таҳсилоти олии тиббии ду кишвар бошад. Бо дарназардошти таҷрибаи назарраси Покистон дар омода намудани кадрҳои тиббӣ, таъкид гашт, ки ҷонибҳо метавонанд масъалаҳои баргузор намудани курсҳои кӯтоҳмуддати такмили ихтисос барои табибони тоҷик ва роҳандозии омӯзишҳои фосилавӣ ва вебинарҳои муштарак дар самтҳои афзалиятноки тибро баррасӣ намоянд.
Инчунин, ҳамкориҳо дар самти ёрии махсусгардонидашудаи тиббӣ, тандурустии рақамӣ, фармасевтика ва таҷҳизоти тиббӣ, мубориза бар зидди бемориҳои сироятӣ, солимии равонӣ ва ҳифзи иҷтимоӣ, ҷалби сармоя ва татбиқи лоиҳаҳои муштарак зимни вохурӣ дар маркази таваҷҷуҳи ҷонибҳо қарор гирифтанд.
Зикр гардид, ки Ҷумҳурии Тоҷикистон ба рушди минбаъдаи ҳамкорӣ бо Ҷумҳурии Исломии Покистон дар соҳаи тандурустӣ аҳамияти махсус медиҳад ва изҳори умедворӣ карда шуд, ки тавассути талошҳои муштарак метавон ба дастовардҳои назаррас ноил гардид.
Вохурӣ дар фазои дустӣ ва ҳусни тафоҳум доир гашта, ҷонибҳо баҳри тақвияти ҳамкориҳо дар масъалаҳои мавриди таваҷҷуҳи тарафайн изҳори ҳавасмандӣ ва омодагӣ зоҳир карданд.
