Имрӯз, 18-уми сентябри соли равон аввалин хосписи кӯдакона дар Тоҷикистон таҳти унвони “ТАСАЛЛО” барои кӯдакони гирифтори бемории саратон дар Муассисаи давлатии «Маркази ҷумҳуриявии илмии саратоншиносӣ»-и Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ифтитоҳ гардид, ки дар он муовини якуми вазири тандурустӣ ва ҳифзи иҷтимоии аҳолии Ҷумҳурии Тоҷикистон Саломуддин Юсуфӣ, директори Фонди хайриявии «Лона» Ҷурахон Бобохонов, директори “Маркази ҷумҳуриявии илмии саратоншиносӣ”

Акбар Муродзода ва кормандони соҳа иштирок намуданд.

Қобили зикр аст, ки шуъбаи мазкур бо ташаббуси Фонди хайриявии «Лона» таъсис дода шудааст.

Акбар Муродзода, директори “Маркази ҷумҳуриявии илмии саратоншиносӣ” зимни ифтитоҳи нахустин шуъбаи “Тасалло” иброз дошт, ки хосписи мазкур барои расонидани кумаки паллиативӣ ба кӯдакони гирифтори марҳилаи IV-и бемории саратон равона гардидааст.

Зикр гардид, ки шуъбаи мазкур ба ҳар як шахс, ҳатто дар марҳилаҳои вазнинтарини беморӣ, на танҳо табобат, балки оромиш, дастгирӣ ва эҳтироми инсонии комилро таъмин менамояд.

Ҳуҷраҳои шуъбаи мазкур бо технологияҳои замонавӣ таъмин шуда, шароити мусоид ба кӯдакон ва хонаводаҳои онҳо, ҳамчунин, имконияти гирифтани ёрии тиббӣ ва руҳиву равонӣ фароҳам карда шудаанд, ки мутахассисони соҳа бо истифода аз имкониятҳои муҳаёгардида, фаъолияти хешро аз пештара боз ҳам беҳтар хоҳанд кард.

Гуфтан ба маврид аст, ки аҳамияти хосписи «Тасалло» низоми кумакҳои паллиативиро барои кӯдакон дар Тоҷикистон таҳким мебахшад инчунин, он нишонаи садоқати хайрия ба арзишҳои башардӯстона буда, саҳми худро дар рушди низоми тандурустии кишвар мегузорад.

Қайд гардид, ки хосписи «Тасалло» на танҳо муассисаи тиббӣ, балки макони гармиву меҳрубонӣ хоҳад буд, ки ҳар кӯдак ва хонаводаи ӯ эҳсоси ғамхорӣ ва пуштибонӣ хоҳанд кард.

Сипас, иштирокчиён аз шуъбаи навтаъсис дидан ба амал оварда, бо шароит ва имкониятҳои мавҷудаи он шинос гаштанд.

Ёдовар мешавем, ки Фонди хайриявии «Лона» соли 2009 дар Ҷумҳурии Тоҷикистон ҳамчун ташкилоти ғайритиҷоратӣ таъсис ёфтааст. Ҳадафи он — кумак ба кӯдаконе, ки аз бемориҳои саратонӣ ва сӯхтагӣ ранҷ мекашанд, равона гардидааст.