27-уми апрели соли равон дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон оид ба натиҷаҳои татбиқи лоиҳаи «BaSIC-Таъсиси системаи ҳамгироишудаи кӯмаки аввалияи тиббию санитарӣ дар Ҷумҳурии Тоҷикистон» мизи мудаввар доир гашт, ки дар он Саид Давлатзода, сардори Раёсати амнияти санитарию эпидемиологӣ, ҳолатҳои фавқулодда ва кўмаки фаврии тиббии вазорат, шарикон оид ба рушд, роҳбарони як қатор муассисаи кумаки аввалияи тиббию санитарии шаҳру ноҳияҳо ва дигар масъулини соҳа ширкат варзиданд.
Дар мизи мудаввар, ки ба ҷамъбасти натиҷаҳои татбиқи лоиҳаи «BaSIC – Таъсиси системаи ҳамгироишудаи кӯмаки аввалияи тиббию санитарӣ дар Ҷумҳурии Тоҷикистон» бахшида шуда буд, қайд гардид, ки ин лоиҳа бо дастгирии Ташкилоти ҷамъиятии Олмон оид ба ҳамкории байналмилалӣ (GIZ) амалӣ гардида, ҳадафи чорабинии имрӯза баррасии дастовардҳо ва муайян кардани қадамҳои минбаъда барои рушди равишҳои ҳамгирошуда дар низоми кӯмаки аввалияи тиббию санитарӣ (КАТС) мебошад.
Дар ин замина, таъкид гардид, ки татбиқи лоиҳаи мазкур ба шарофати кӯшишҳои ҳамоҳангшудаи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, созмонҳои шарик ва бо дастгирии молиявии Вазорати федералии ҳамкориҳои иқтисодӣ ва рушди Олмон (BMZ) ва Иттиҳоди Аврупо дар доираи лоиҳаи BaSIC, ки аз ҷониби GIZ дар Тоҷикистон амалӣ мешавад, имконпазир гардид.
Тавре иттилоъ дода шуд, дар давраи татбиқи лоиҳа натиҷаҳои назаррас ба даст омаданд. Аз ҷумла дар як қатор муассисаҳо алгоритмҳои пешбурди муштараки беморони гирифтори сил ва ВНМО ҷорӣ карда шуда, ҳамкории мутахассисони соҳаҳои гуногун ба роҳ монда шуд ва масири ҳаракати беморон (маршрутизация) беҳтар гардид.
«Пешгирӣ ва назорати сироятҳо-ин танҳо маҷмӯи қоидаҳо ва стандартҳо нест. Ин фарҳанги бехатарӣ мебошад, ки бояд дар фаъолияти ҳаррӯзаи ҳар як корманди тиб ҷой дошта бошад. Дар доираи лоиҳа барои таҳкими ин фарҳанг қадамҳои ҷиддӣ гузошта шуданд: чорабиниҳои омӯзишӣ гузаронида шуда, стандартҳо ҷорӣ гардиданд ва шароит барои риояи талаботи санитарию эпидемиологӣ беҳтар карда шуд»,- зикр гашт дар мизи мудаввар.
Дар идомаи мизи мудаввар як қатор иштирокчиён низ доир ба натиҷаҳои татбиқи лоҳаи болозикр баромад карданд.
