Бо мақсади густариш додани ҳамкориҳо дар бахши экспертизаи тиббӣ-судӣ байни Ҷумҳурии Тоҷикистон ва Ҷумҳурии Ӯзбекистон санаи 13-уми феврали соли равон дар Муассисаи давлатии “Маркази ҷумҳуриявии экспертизаи тиббӣ-судӣ”-и Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ҷаласаи корӣ доир гашт, ки дар он директори маркази мазкур Абдукаримзода Ш.А., директори Маркази илмии ҷумҳуриявии экспертизаи тиббӣ-судии Ҷумҳурии Узбекистон, профессор Рузиев Шерзод Ибадуллоевич, муовини директори Маркази илмии ҷумҳуриявии экспертизаи тиббӣ-судии Ҷумҳурии Узбекистон, доктори илмҳои философии PhD дар соҳаи тиб Туронов Бобур Собируғлӣ, директори филиали Маркази илмии ҷумҳуриявии экспертизаи тиббӣ-судии Ҷумҳурии Узбекистон дар вилояти Бухоро Саибов Ҳакимҷон Мавлонович иштирок намуданд.
Зимни ҷаласаи корӣ иштирокчиён доир ба густариши ҳамкориҳои дуҷониба дар бахши экспертизаи тиббӣ-судӣ мубодилаи афкор намуда, ҳолати кунунӣ ва дурнамои ҳамкориҳоро баррасӣ карданд.
Ҳамин тавр, байни Муассисаи давлатии “Маркази ҷумҳуриявии экспертизаи тиббӣ-судӣ”-и Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва Маркази илмии ҷумҳуриявии экспертизаи тиббӣ-судии Ҷумҳурии Узбекистон баҳри баланд бардоштани савияи дониши кормандон, иштирок намудан дар конфросҳо, гузаронидани семинарҳои илмию методӣ, омӯзиши коршиносони озмоишгоҳҳо дар марказҳо ва ҳамкории байни муассисаҳои экспертизаи тиббӣ-судии ду кишвар шартномаи ҳамкорӣ ба имзо расонида шуд.
